سټنډرډ ملي ادارې خپلو یو شمېر نويو ګمارل شویو کارکوونکو ته ښوونیز برنامه ترسره کړه

د کیفیت مدیریت سټنډرډونو او د سټنډرډ جوړونې تر عنوان لاندې ښوونیزه برنامه د سټنډرډ ملي ادارې د بشري سرچینو امریت او د ملي ستنډرډونو او ودانیزو کوډونو د جوړولو او رواجولو ریاست په همکارۍ ددې ادارې په لسهاوو تنو نویو ګمارل شویو کارکوونکو ته ترسره شوه.

ددې برنامې د پیل په مراسمو کې د سټنډرد ملي ادارې د تخنیکي چارو مرستیال مولوي محمد آصف قانت ددې برنامې د ارزښت په اړه وینا کړه او وویل: اړینه ده چې د ادارې کارکوونکي د ادارې د فعالیتونو او موخو اړوند کافي معلومات ولري. نوموړي د علم او پوهې د اهمیت په اړه ګدونوالو ته وویل: بریالیتوب پرته له هڅو څخه نه ترلاسه کیږي، نو د علم د ترلاسه کولو، مهارتونو لوړولو او د ګټورو فعالیتونو ترسره کولو په موخه باید د خدمت کولو په برخه کې له هيڅ ډول کوښښ او هڅې څخه دریغ ونه کړو.

په دوام یې د ملي ستنډرډونو او ودانیزو کوډونو د جوړولو او رواجولو ریاست د مدیریت کیفیت سټنډرډونو د جوړولو امر محترم انجنیر عتیق الله یاسر اړین معلومات د پرزینټیشن په قالب کې ددې برنامې ګډونوالو ته وړاندې کړل.

دا برنامه به دوه ورځې دوام وکړي، چې د سټنډرډ ملی ادارې د کارکوونکو د پوهاي او ظرفیت لوړونې په برخه کې به خورا ګټوره و اوسي.