د سټنډرډ ملي ادارې د لوی رییس په مشرۍ اونیزه اداري غونډه جوړه شوه.
۲ وری ۱۳۹۹
د سټنډرډ ملي ادارې د لوی رییس عزیز احمدزي په مشرۍ اونیزه اداري غونډه جوړه شوه چې د ادارې مرستیال، سلاکارانو، رییسانو او د بېلا بېلو برخو اړونده مسوولینو په کې برخه لرله.
په غونډه کې د ادارې پر لومړیتوبونو بحث وشو او د ښاغلي احمدزي په وینا چې د تصدیق پاڼو(سرټیفکشن) وېش مهمه پروسه ده او په دې برخه کې یې د چارو پر لا چټکیا او جدیت تاکید وکړ. د هغه په خبره له فرصت څخه په ګټنه به په نږدې راتلونکي کې د تصدیق پاڼو د وېش پروسه پیل شي. نوموړي په اداره کې د چارو پر انسجام او د همغږۍ او همکارۍ پر غوراوي ټینګار وکړ.
د غونډې په لړ کې اړونده مسوولینو د تېرې اونۍ د چارو راپور وړاندې کړ او د رهبرۍ پلاوي له لوري یې په اداري او تخنیکي برخه کې مهمې سپارښتنې ترلاسه کړې.
