د ستنډرډ ملي ادارې لوی رییس د افغانستان د صنایع او کانونو خونې له رییس سره لیدنه وکړه.
د سټنډرډ ملي ادارې لوی رییس ښاغلي انجنیر ذبیح الله زیارمل د افغانستان د صنایع او کانونو خونې له رییس ښاغلي شیرباز کمین زاده سره لیدنه وکړه. په دغه لیدنه کې د دواړو لور د اړوند برخو مسوولینو هم ګډون درلود.
ښاغلي زیارمل په هېواد کې یوه صنعتي انقلاب ته د رسېدلو لپاره په افغاني تولیداتو او صنایعو په برخه کې د سټنډرډونو کارول حیاتي وکڼل او په وینا یې په داخلي تولیداتو او محصولاتو کې د سټنډرډونو پلي کول د معیار جوړونې او د ملي او نړیوال اعتبار د لاسته راوړلو لپاره حتمي او اړین دي. هغه همدارنګه زیاته کړه چې انسا د ادارې په بېلا بېلو برخو کې په ځانګړې توګه د توکو د کیفیت د ازمېیښت لابراټوارونه خصوصي سکټور ته فرصتونه برابروي او د یوې ګډې ژبې د ایجاد لپاره متداومې او واضیح همکارۍ ته ژمنه ده.
ښاغلي کمین زاده له خصوصي سکټور څخه د ملاتړ په موخه د انسا ادارې له پروګرامونو څخه مننه وکړه او ښاغلي زیامل ته یې په چارو کې د لا پرمختګ او بریا هیله وکړه. هغه همدارنګه و ویل چې د صنایع او کانونو خونې ډیری چارې له انسا ادارې سره تړلې دي.
په پای کې دواړو لورو د همکارۍ هوکړه لیکونو پر کولو توافق وکړ او دغه راز دواړو لورو د لا زیاتې همکارۍ او همغږۍ ژمنې وکړې.
