په کابل کې د سټنډرډ جوړونې د فرهنګ د دود کولو کمپاین پیل شو
د افغانستان سټنډرډ ملي اداره د خلکو او سوداګرو د پوهاوي لپاره، د "د سټنډرډ جوړونې د فرهنګ دود کولو" تر عنوان لاندې یو کمپاین د کابل ښار د دولسمې ناحیې ارزانقیمت سیمه کې پیل کړ.
په دې کمپاین کې د ملي سټنډرډ ادارې ویاند قاري محمد یوسف غاور او ددې ادارې مطبوعاتي ټیم ګډون درلود. ددې کمپاین په ترڅ کې د سټنډرډونو شعارونه او نښې د ښار په عمومي سړکونو او په بیلابیلو ځایونو کې نصب شول.
ددې کمپاین موخه دا ده چې د خلکو د پوهاوي کچه لوړه شي، ترڅو دوی د سټنډرډونو پر اهمیت پوه شي او دا درک کړي چې سټنډرډونه د محصولاتو او خدمتونو د کیفیت د ښه والي او د خلکو د ژوند د سطحې د لوړوالي لپاره ډېر مهم دي.
د سټنډرډ ملي ادارې ویاند پدې کمپاین کې ټینګار وکړ چې سټنډرډ جوړونه نه یوازې د خلکو د ژوند کیفیت ته وده ورکوي، بلکې د کورنیو تولیداتو د ښه والي، د سوداګرۍ د اسانتیا او د هېواد د اقتصاد د ودې لپاره هم مهم رول لري.
دا کمپاین هڅه کوي چې د خلکو، سوداګرو او د سټنډرډ ملي ادارې د مسؤلینو ترمنځ مؤثره اړیکې رامنځته کړي او د سټنډرډ جوړونې فرهنګ د خلکو د ورځني ژوند یوه مهمه برخه وګرځوي.
