په سټنډرډ ملي اداره کې د بیرغ ملي ورځ ولمانځل شوه.
۷/ زمری/۱۴۰۰
په سټنډرډ ملي اداره کې د بیرغ ملي ورځ د یو لړ مراسمو پر مهال د دې ادارې د لوی رییس ذبیح الله زیارمل، رییسانو، کارکوونکو او یو شمېر امنیتي ځواکونو په ګډون سره ولمانځل شوه.
په دغه مراسمو کې ښاغلي زیارمل د بیرغ ملي ورځې لمانځل با عظمته وګڼل او ملي بیرغ یې د هېواد د ملي هویت، عزت، ازادۍ او همبستګۍ سمبول وګاڼه. نوموړي له امنیتي ځواکونو څخه د ملي بیرغ د لوړ رپولو په تړاو مننه وکړه او د افغانستان د دښمنانو په وړاندې یې مبارزه او درېدل د هر افغان دنده وګڼله. هغه د دولت له مخالفینو څخه وغوښتل چې د سولې له پروسې سره یو ځای شي او د دې ملي نماد تر سیوري لاندې د عزت ژوند وکړي. ښاغلي زیارمل وښوده د ملي بیرغ برم او احترام د هېواد په پراختیا کې مهم او حیاتي دي.
دغه راز په انسا اداره کې د هېواد ملي بیرغ په ځوړندولو او د کارکوونکو له لوري د فرهنګي شعرونو په ویلو سره د ملي بیرغ درناوی وشو. دا ورځ د افغانستان اسلامي جمهوریت جلالتماب جمهور رییس د فرمان پر بنسټ لمانځل کېږي چې د یوالي او وطني حس او روحیې په پیاوړي کولو کې رول لري.
