د سټنډرډ ملي ادارې د چاپېریال سټنډرډونو د تخنیکي کمیټې غونډه جوړه شوه
د سټنډرډ ملي ادارې د چاپېریال ساتنې سټنډرډونو د تخنیکي کمیټې غونډه، د اړوندې کمیټې د مشر او غړو په شتون کې، د دغې ادارې د تخنیکي غونډو په تالار کې ترسره شوه.
پدې غونډه کې د فاضله اوبو د لېږد تجهیزاتو د سټنډرډ مسودې پر مهمو موضوعاتو او تخنیکي ټکو باندې بحث او نظرونه تبادله شول. دغه سټنډرډ د ودانیو او سایټونو لپاره د فاضله اوبو د لېږد تجهیزاتو (دریمه برخه: د محدودو کارونې لپاره د لېږد وسایل) ته ځانګړی شوی دی.
د فاضله اوبو د تصفیې موخه د چاپېریال له ککړتیا څخه مخنیوی او ددې اوبو د بیا کارونې وړ ګرځول دي، چې پدې برخه کې فزیکي، کیمیاوي او بیولوژیکي میتودونه د زیان رسوونکو توکو د لهمنځه وړلو لپاره کارول کېږي.
د سټنډرډ ملي اداره ژمنه ده چې د چاپېریال سټنډرډونو د جوړونې او تطبیق له لارې د عامې روغتیا خوندیتوب او د هېواد د اوبو سرچینو ساتنه یقیني کړي.
