د سټنډرډ ملي ادارې د مشرتابه پلاوي غونډه ترسره شوه.
۹/زمری/۱۴۰۰
د سټنډرډ ملي ادارې د مشرتابه پلاوي غونډه د دې ادارې د لوی رییس ښاغلي ذبیح الله زیارمل په مشرۍ جوړه شوه چې عمومي رییسانو، سلاکارانو او د اړونده برخو مسوولینو په کې برخه لرله.
ښاغلي زیارمل د چارو د راپورونو تر اورېدلو وروسته په لا زیات کاري تحرک او د شعبو تر منځ په زیاتې پیاوړتیا او همغږۍ ټینګار وکړ. هغه و ویل مونږ اړتیاو ته د لازمې لاس رسۍ، د موجوده خلاو له منځه وړلو او په هېواد کې د تولیدي او صنعتي شرکتونو له مخینو څخه په ګټه اخیستنې برخه کې له خصوصي سکټور سره دوامداره مشارکت او همکارۍ ته متعهد یو. نوموړي زیاته کړه د قانون پر بنسټ د سټنډرډونو پر پلي کولو څار د انسا مسوولیت دی او مونږ له خصوصي سکټور سره د مشترکو همکاریو د روحیې پیاوړي کولو په لټه کې یو او مونږ په رښتینې توګه د کیفیت ملي بنسټ د پیاوړتیا او د چوپړتیاو د وړاندې کولو لپاره باید مسوولانه هڅه وکړو.
په همدې توګه د غونډې له اجنډا سره سم د اداري چارو د برښنایي کولو، د سټنډرډ نښان طرحه او ډیزاین، د پیریدونکو د چوپړتیاو د مرکز ایجاد، له بهرنیو هېوادونو د سټنډرډ ادارو سره د انسا د اړیکو پیاوړتیا، د چوپړتیاو د وړاندې کولو غوره والی، د پوهنتونونو زده کړیالانو ته د زده کړیزو پروګرامونو برابرول، د هرې برخې د دندو تفکیک او یو شمېر نورو مهمو مواردو بحث ترسره شو.
په همدې توګه پرېکړه وشوه، څو د ښارونو په مرکزونو کې د سټنډرډ د چوپړتیاو او د ټوریډو توکو د کیفیت کنټرول په برخه کې د وضعیت د نورمال حالت تر واقع کېدلو پورې خپلو چوپړتیاو وړاندې کولو ته دوام وکړي. دغه راز د پرېکړه لیکونو د نهایي کېدلو او نورو چارو لپاره مشخصې کمېټې جوړې شوې.
د غونډې په پای کې د انسا ادارې لوی رییس په حساب ورکولو کې د شفافیت پر تطبیق ټینګار وکړ او د چارو د لا ښه والي په موخه یې لازمې سپارښتنې او لارښوونې وکړې.
