د سټنډرډ ملي ادارې د رهبرۍ پلاوي اونیزه غونډه ترسره شوه.
۱۵/لړم/۱۳۹۹
د سټنډرډ ملي ادارې د رهبرۍ پلاوي اونیزه غونډه د دې ادارې د لوی رییس عزیز احمدزي په مشرۍ ترسره شوه چې مرستیالانو، سلاکارانو او اړونده رییسانو او کارکوونکو په کې برخه درلوده.
په پیل کې ښاغلي احمدزي د ادارې په چارو کې د پرمختګ پر څرنګوالي هر اړخیزه خبرې وکړې او پر بېلا بېلو موضوعاتو یې بحث وکړ. نوموړي د راتلونکي( ۱۴۰۰) کال د پروژو د عملي کولو پر طرحه او د نورو هېوادونو له سټنډرډ ادارو سره د انسا ادارې د اړیکو پر پیاوړتیا ټینګار وکړ.
د دې ترڅنګ په تېره اونۍ کې د عوایدو د زیاتوالي یادونه وشوه او د ولایتي څانګو په چارو کې د نظم او شفافیت په موخه اړینې لارښوونې وشوې.
دغه راز رییسانو او کارکوونکو د تېرې اونۍ راپورونه او راتلونکي کاري پلانونه وړاندې کړل او د دوی ستونزو ته پر وخت د رسیدګۍ په تړاو یې له رهبرۍ مننه وکړه.
د غونډې په پای کې ښاغلي احمدزي اړونده برخو ته دنده وسپارله، څو په خپلو دندو کې ځیرک اوسي او د چارو او فعالیتونو د غوراوي په برخه کې یې د یو شمېر تګلارو سپارښتنه وکړه.
