په سټنډرډ ملي اداره کې د جنډر ملي او نړیوالې ژمنې او پالیسي تر عنوان لاندې زده کړیز ورکشاپ ترسره شو.
۲۲/ چنګاښ/۱۴۰۰
په سټنډرډ ملي اداره کې د جنډر ملي او نړیوالې ژمنې او پالیسي تر عنوان لاندې زده کړیز ورکشاپ ترسره شو. دغه ورکشاپ چې د جنډر امریت او د ښځو چارو وزارت په نوښت ترسره شو، د مالي او اداري چارو عمومي رییس محمد وحید نوري او د دې ادارې یو شمېر ښځینه او نارینه کارکوونکو په کې برخه لرله.
ښاغلي نوري له دا ډول زده کړیزو پروګرامونو له ترسره کولو مننه وکړه او د ټولنې په بېلا بېلو برخو کې یې د ښځو رول مهم وګاڼه. د هغه په خبره د عامه پوهاوي د کچې لوړول، د ښځو د وړتیا وده او د قواعدو او مقرراتو رعایت په ځانګړې توګه د ښځو د حقونو او مشروع ازادۍ په برخه کې د ټولنې د ټولو قشرونو د پوهاوي لپاره دې پرله پسې هڅې وشي. هغه وښوده چې د انسا ادارې رهبري ژمنه ده چې وړتیاو او محدودیتونو ته په پام په اداره کې د ښځو رول زیات کړي او همدارنګه د جنډر برخه د هغوی له ځانګړي ملاتړ برخمنه ده چې د جنډر ستونزو ته اړینه رسیدګي کېږي.
دا پروګرام د معلوماتو د لېږد او د ملي او نړیوالو قوانینو، د بشر حقونو نړیوالې اعلامیې، د ښځو په وړاندې د هر ډول تبعیض د مخنیوي کنوانسیون په برخه کې د پوهاوي د ولوړولو او د اړونده پرېکړه لیکونو په موخه ترسره شوه چې د ګدونوالو له لوري یې استقبال وشو.
