د سټنډرډ ملي ادارې د رهبرۍ پلاوي غونډه ترسره شوه
پنجشنبه
۱۰/تله/۱۳۹۹
د سټنډرډ ملي ادارې د لوی ریس عزیز احمدزي په مشرۍ د رهبرۍ پلاوي غونډه ترسره شوه. په دغه غونډه کې اړوندو رییسانو او امرینو برخه درلوده چې د خپلو وروستیو فعالیتونو راپورونه یې غونډې ته وړاندې کړل.
ښاغلي احمدزي د عوایدو پر زیاتوالي تاکید او تر څنګ یې هېواد ته د وارداتي توکو په برخه کې د شفافیت د تامین یادونه وکړه.
د هغه په وینا د عوایدو د لوړوالي او د ادارې موخو ته د رسېدو لپاره چټک کار ته اړتیا ده چې باید ترسره یې کړو.
د غونډې په جریان کې د صادراتي توکو لپاره د سرټیفکشن پر وېش بحث وشو چې په دغه برخه کې انسا اداره مسوولیت لري او د سرټیفکشن د ترویج لپاره باید له ټولو اړینو لارو کار واخیستل شي.
همدا راز د سټنډرډ د نړوالې ورځې د لمانځغونډې په تړاو بحث د غونډې یوه برخه وه او اړونده کسانو ته له مسوولیت سره سم سپارښتنې وشوې.
د دې ترڅنګ د بشپړو، نا بشپړو او راتلونکو پروژو په تړاو خبرې اترې وشوې او په دې برخه کې د مثبتو تغیراتو او د کار پر چټکیا تمرکز وشو.
د غونډې په پای کې ښاغلي احمدزي پر وخت او د غوره اجرائاتو په تړاو هر اړخیزې خبرې وکړې او په وینا یې چې مونږ ژمن یو، څو خپلې دندې تر پخوا په ښه ډول ترسره او په هېواد کې واقعي ځای ته د دې ادارې د رسولو لپاره د ادارې د ټولو برخو رښتینو هڅو ته دوام ورکړو.
