له متشبثینو او سوداګرو څخه د ملاتړ لپاره د دولت او خصوصي سکټور تر منځ د اړیکو د پیاوړتیا په موخه ناسته ترسره شوه.

دوشنبه

۳۱/ غبرګولی/۱۴۰۰

د سوداګرۍ په برخه کې د اسانتیا او ګډې ژبې د ایجاد ایجاد او له سوداګرو او متشبثینو څخه د ملاتړ لپاره د دولت او خصوصي سکټور تر منځ د اړیکو د پیاوړتیا په موخه ګډه ناسته د سټنډرډ ملي ادارې د لوی رییس انجنیر ذبیح الله زیارمل په مشرۍ ترسره شوه.

په دغه ناسته کې د افغانستان د خونو فدراسیون لوی رییس محمد اسماعیل غضنفر، د سوداگری خونو د عامل مشر شفیق الله عطایی، د نړیوالې سوداګرۍ مرکز مشر عبدالقدیر بهمن، د کرنې او مالدارۍ د تولیدي خونې رییس خان محمد فروتن، د افغانستان د ودانیزو شرکتونو د اتحادیې (ABA) اجرایوي مشر، د اوسپنې ویلي کولو د فابریکو اجرایوي مشر عبدالنصیر رښتیا، د ښځینه صنایعو خونې د عامل پلاوي مرستیالې پرورش اوریاخېل، د کسبګرو او هټیوالو خونې، د کانونو او صنایعو خونې او د خصوصي سکټور یو شمېر نورو اړوندو ادارو استازو ګډون درلود.

په دغه ناسته کې ښاغلي زیارمل په هېواد کې د معیاري تولیدي محصولاتو او چوپړتیاو د وړاندې کولو او د صادراتو د حجم د زیاتوالي په برخه کې د سټنډرډ ملي ادارې او د خصوصي سکټور پر رول خبرې وکړې. نوموړي دغه راز د سټنډرډ مارک پر ترویج ټینګار وکړ او په خبره یې د دې پروسې په پلي کېدلو سره افغاني تولیدات په نړیوال بازار کې پراخ باور ترلاسه کوي او پر صادراتي حجم مثبت اغېز پرېباسي. ښاغلي زیارمل د خپلو خبرو پر دوام د سټنډرډونو پر تدوین او تطبیق او دغه راز د یادو سټنډرډونو پر ترویج او په دې برخه کې پر لاسته راوړنو خبرې وکړې. نوموړي د یوه پروګرام له مخې د سرټیفکټ د وېش او په دې تړاو د نندارتون د جوړولو یادونه وکړه چې له مخې به یې سټنډرډونه ترویج کېږي.

دغه راز ښاغلي غضنفر خصوصي سکټور ته د پاملرنې او ملاتړ په برخه کې د ښاغلي زیارمل د هڅو ستاینه وکړه او د دولت او خصوصي سکټور تر منځ یې د همکارۍ او همغږۍ روحیې پر ایجاد ټینګار وکړ.

د دې ترڅنګ د خصوصي سکټور استازو په هېواد کې د وارداتي توکو د کیفیت پر کنټرول ټینګار وکړ. همدا راز د سټنډرډ ملي ادارې او د خصوصي سکټور تر منځ د ګډې کاري کمېټې پر ایجاد بحث وشو چې له مخې به یې د سوداګرۍ په وړاندې د خنډونو او ستونزو د حل لپاره ګام پورته کېږي.

د دغې ناستې په پای کې د وارداتي او صادراتي توکو د کیفیت د کنټرول لپاره پر دوه اړخیزه همکارۍ ژمنه وشوه چې له مخې به یې په کورني او نړیوال بازار کې د مثبتې سوداګرۍ شاهدان وو.